काठमाडौँ : प्रतिनिधिसभा विघटन बदर गर्न र प्रतिनिधिसभा सदस्य शेरबहादुर देउवालाई प्रधानमन्त्री पदमा नियुक्त गर्ने माग सम्बन्धी विचाराधीन रिटहरूमा सर्वोच्च अदालतमा आजदेखि अन्तिम सुनुवाइ सुरु हुँदैछ ।
सर्वोच्च अदालतको संवैधानिक इजलासले गत जेठ २६ गते विपक्षीहरू राष्ट्रपतिको कार्यालय, प्रधानमन्त्री तथा मन्त्रिपरिषदको कार्यालय र सभामुखसँग लिखित कारण माग गर्दै असार ९ गतेदेखि लगातार सुनुवाइ हुने जनाएको थियो। विपक्षीहरूबाट जवाफ पेस भइसकेको छ ।
रिट प्रधानन्यायाधीश चोलेन्द्रशम्शेर जबरा, न्यायाधीशहरू दीपककुमार कार्की, ईश्वरप्रसाद खतिवडा, मिरा खड्का र डा. आनन्दमोहन भट्टराई रहेको संवैधानिक इजलासमा विचाराधीन छ ।
प्रतिनिधिसभाका १४६ जना सांसदले प्रतिनिधिसभा विघटन बदर गर्न र संविधानको धारा ७६(५) अनुसार प्रतिनिधिसभा सदस्य शेरबहादुर देउवालाई प्रधानमन्त्रीमा पदमा नियुक्त गर्न माग गर्दै रिट दायर गरेका छन् ।
यी रिटहरूमा अन्तरिम आदेश हुनुपर्ने भन्ने माग संवैधानिक इजालासले अस्वीकार गरेको थियो ।
